दाङ, १५ बैशाख ।

 रोल्पाको त्रिवेणी गाउँपालिका वडा नम्वर २ मा भिषण आगलागी भएको छ । सोमवार देखी जंगलमा लागेको आगो मंगलवार दिउँसो मानव बस्तीमा फैलिदा वडाको अधिकांस मानव बस्तीमा आगलागी हुदा झन्डै चालिस वटा घरगोठ जलेर नष्ट भएको गाउँपालिकाका अध्यक्ष सन्त बहादुर वलीले जानकारी दिनुभयो । उहाका अनुसार आगलागीबाट २१ वटा घर र १९ वटा गोठ गरी चालिस वटा घरगोठ जलेर नष्ट भएका छन् ।जंगलमा लागेको आगो स्थानियहरुले सोमवार देखी नियन्त्रणमा लिने प्रयास गरेपनि मंगलवार हावाहुरीको तिव्र गतिका कारण मानव बस्तीमा पस्दा घरगोठ जलेर नष्ट हुनुको साथै दर्जन बढि पशुचौपाय समेत मरेको अध्यक्ष वलीले जानकारी दिनुभयो ।

दिउँसोको समय भएकाले मानविय क्षति नभएपनि पशुचौपाय र धनमालको क्षति भएको छ । घटनाको सम्पुर्ण विवरण तयार हुन बाँकी रहेको उहाले जानकारी दिनुभयो । वडाको नुवावाङ, धनवाङ ,बर्तिवाङ, रामपुर लगाएतमा मानव बस्तीमा आगलागी भएको हो । आगो अझै पुर्ण रुपमा नियन्त्रणमा आएको छैन र नियन्त्रणमा लिनका लागी स्थानिय, सुरक्षाकर्मी र जनप्रतनिधिहरु खटिएको उहाले जानकारी दिनुभयो । आगलागी पिडितहरुलाई सुरक्षित ठाउँमा सारिएको र तत्काल व्यवस्थापनको लागी तयारी भईरहेको अध्यक्ष वलीले जानकारी दिनुभयो ।