काठमाडौँ, जेठ ९ गते — सत्तारुढ नेपाली कांग्रेसले जग्गा व्यवसायलाई सहज बनाउने उद्देश्यसहित भूमि सम्बन्धी ऐनमा संशोधन गर्ने पहल गर्ने निर्णय गरेको छ।

आज बसेको पार्टी संसदीय दलको बैठकमा भूमि ऐनको आठौँ संशोधनसँग जोडिएका कानूनी अप्ठ्यारा र कार्यान्वयनमा देखिएका जटिलताबारे छलफल गरिएको हो।

पार्टीका प्रमुख सचेतक श्यामकुमार घिमिरेले जानकारी दिए अनुसार, संशोधनपछि कम्पनीहरूले हदबन्दीभन्दा बढी जग्गा किन्न सक्ने तर बिक्री गर्न नपाउने प्रावधानले व्यवसायिक कार्यान्वयनमा बाधा पु¥याएको निष्कर्षमा कांग्रेस पुगेको छ।  “हामी ऐनको दफा १२ मा संशोधन गरेर हदबन्दी छुटको जग्गा पनि बिक्री गर्न दिने व्यवस्था गर्न चाहन्छौँ,” घिमिरेले भने।

सुकुम्बासी समस्या समाधानका लागि विशेष ध्यान

बैठकमा अव्यवस्थित बसोवास, भूमिहीन सुकुम्बासी तथा दलित सुकुम्बासीको समस्या समाधान गर्ने विषयमा समेत छलफल भएको छ।  कांग्रेसले २०६६ सालभन्दा अगाडि खाली जग्गामा बसोबास गरिरहेका सुकुम्बासीहरूलाई लालपुर्जा वितरण गर्ने प्रस्तावसहित भूमि सम्बन्धी ऐनमा संशोधन गरिने जनाएको छ।

घिमिरेका अनुसार, यसका लागि पहिले तयार पारिएको विधेयकमा केही प्राविधिक संशोधनहरू गरेर अघि बढ्ने निर्णय भएको छ। प्रस्तावित संशोधनले भूमि ऐन, २०२१ का विभिन्न धाराहरूलाई परिमार्जन गर्नेछ।

प्रमुख बुँदाहरू:

• जग्गा खरिद–बिक्री प्रक्रियालाई सरल बनाउने संशोधनको तयारी
• हदबन्दीभन्दा बढी जग्गा खरिद गर्न पाउने तर बिक्री गर्न नपाउने नियम परिवर्तनको तयारी
• सुकुम्बासी र दलित समुदायलाई लक्षित गरी लालपुर्जा वितरणको प्रस्ताव
• ऐनको दफा १२ लगायतका प्रावधानमा संशोधन गरिने