दाङ ११ जेठ – दाङ जिल्लामा राष्ट्रिय परिचयपत्र बनाउने नागरिकको संख्यामा वृद्धि भए पनि तयार भइसकेका कार्ड लिन आउनेहरू भने अपेक्षा अनुसार देखिएका छैनन्।

जिल्ला प्रशासन कार्यालय, घोराहीका अनुसार, पछिल्ला पाँच वर्षमा ३ लाख ८० हजार ७७७ जनाले बायोमेट्रिक विवरणसहित राष्ट्रिय परिचयपत्रको लागि आवेदन दिएका छन्। तीमध्ये हालसम्म ४५ हजार ४५० जनाको परिचयपत्र जिल्ला आइपुगेको भए पनि लिनेको संख्या केवल २० हजार ७१६ मात्र रहेको छ।

२४ हजारभन्दा बढी कार्ड थन्किए
सहायक प्रमुख जिल्ला अधिकारी यज्ञबहादुर बुढाका अनुसार, जिल्लामा २४ हजार ७३४ जना नागरिकले तयार भइसकेको परिचयपत्र अझै लिन बाँकी छ। सन् २०७७ साउनदेखि सुरु भएको परिचयपत्र वितरण कार्यमा नागरिकको सहभागिता सुरुवातमा उत्साहजनक देखिए पनि पछिल्लो समय वितरण पक्षमा सुस्तता आएको हो।

आवेदन दिने महिला बढी
आवेदनदातामध्ये २ लाख १० हजार ३८८ जना महिला छन् भने १ लाख ७० हजार ३८९ जना पुरुष छन्। जिल्लामा घोराही, लमही र तुलसीपुरस्थित तीनवटा स्थानबाट राष्ट्रिय परिचयपत्रको लागि आवेदन र वितरण सेवा दिइँदै आएको छ।

कार्ड नलिने कारणहरू
सरकारले राहदानी, बैंक खाता, सामाजिक सुरक्षा भत्ता लगायत सेवाका लागि राष्ट्रिय परिचयपत्र आवश्यक बनाइए पनि हाल डिजिटल प्रणालीमार्फत ‘नम्बर मात्र भए पुग्ने’ व्यवस्थाले नागरिकले कार्ड लिन आवश्यक नठानेको अधिकारी बुढाले बताए। साथै, कतिपय नागरिक रोजगारीका लागि विदेश गएकाले पनि लिन नआएको हुन सक्ने उनले जनाए।

दैनिक सयौं आवेदन, तर वितरणमा सुस्ती
प्रशासन कार्यालयले दैनिक करिब सय नागरिकबाट नयाँ आवेदन लिँदै आएको छ तर वितरणतर्फ भने मात्र १०–१५ जना मात्र कार्ड लिन आउने गरेको जनाइएको छ।

कार्ड लिन नागरिकको चासो बढाउनु आवश्यक
राष्ट्रिय परिचयपत्र नागरिकको बहुआयामिक जानकारी समेटिएको सरकारी दस्तावेज हो। यसलाई मात्र नम्बरको रूपमा प्रयोग गर्नुको सट्टा भौतिक कार्ड लिने संस्कृति विकास गर्न सरोकारवाला निकायले सक्रियता देखाउनु आवश्यक देखिन्छ।